Кулун тутар 20 күнүгэр Дьокуускай куорат 39 нүөмэрдээх “Остуоруйа дойдута” оҕо уһуйааныгар ССРС суруйааччыларын союһун чилиэнэ, Аҕа дойду Улуу сэриитин кыттыылааҕа, “Бочуот знага” уордьанын уонна мэтээлин кавалера Гавриил Григорьевич Вешников – Баал Хабырыыс хоһооннорун дорҕоонноохтук ааҕыы түһүлгэтэ буолла.

Баал диэн балкыыр, балхаан, улахан, күүстээх долгун. Поэт аата этэринии, улахан долгун курдук түллэн, баалланан, сүрдээх элбэх хоһоонунан суруллубут чулуу айымньылары айан ааҕааччыларга бэлэхтээбитэ.

Бу тэрээһин сүрүн сыала — саха талааннаах поэта Баал Хабырыыс аатын үйэтитии, кини айар үлэтин, айымньыларын кытта билсии, оҕолор ааҕар талааннарын, дьоҕурдарын сайыннарыы, төрөөбүт тылга тапталы иҥэрии.

Саха киһитин үтүө үгэһин быһыытынан кырачаан ыалдьыттарбытын минньигэс аһынан көрсөн-күндүлээн, хаартыскаҕа түһэн түгэни хатаан тэрээһиммитин саҕалаатыбыт.

Хоһоон хомоҕой хонуутун киирии тылынан аста биһиги уһуйааммыт салайааччыта, Саха Республикатын Үөрэҕириитин Туйгуна Надежда Петровна Андреева.

Ыалдьыттарга анаан эҕэрдэ нүөмэрдэри бэлэхтээтилэр биһиги уһуйааммыт педагогтара “Сир симэхтэрэ” үҥкүү ансамбла /салайааччы: Ю. П. Федорова/ уонна Москва куоракка ыытыллар Аан дойдутааҕы “Рождественские звёзды” фестиваль 1 степеннээх лауреата, Турция Алания куоратыгар ыытыллар Аан дойдутааҕы “Санат Пирлантаси” фестиваль 2 степеннээх лауреата, “Звёзды Долины Туймаады — 2019” Гран-при хаһаайына   — “Күлүмчээн” вокальнай ансамбль /салайааччы: Р. Я. Спиридонова/.

 

 

 

 

 

 

 

Хоһоон түһүлгэтэ үгүс оҕо-аймаҕы түмэ тарта. Уопсайа Дьокуускай куорат  уһуйааннарыттан 32 оҕо кыттыыны ылла.

 

 

 

 

 

 

 

 

 

 

 

 

 

 

 

 

 

 

 

Оҕолор хас биирдии хоһоону сүрэхтэригэр чугастык ылынан, сэҥээрэн иһиттилэр. Өрүү маннык араас тэрээһиннэргэ көхтөөхтүк кыттан, үүнэ-сайда туралларыгар ситиһиилэри баҕарыаҕыҥ!

Фестиваль кыттыылаахтарыгар туоһу суругу туттардылар саха тылын уһуйааччыларын салайааччылара Марфа Револьевна Федорова, Надежда Николаевна Руфова.

 

Саха тылыгар эбии үөрэхтээһин педагога Фёдорова Л. И.

Метки: